節目受歡迎與參賽者無關，反而一眾美女鑑定團成員先至係焦點所在。佢哋每集都會出現，負責點評男參賽者，替女參賽者提供最後意見，而鑑定團嘅點評，全以狠辣見稱，其中有幾位美女鑑定團成員，更因此走紅。

毒舌評審 出口傷人

就好似嚟自北京嘅平面模特兒馬諾咁，自從在節目亮相後就人氣爆燈，佢出名評語刻薄，亦好大口氣，話揀男友一定要有錢，出入要有名車接送。佢呢種拜金主義作風令部分人好反感，但同時亦有大批支持者，特別係一啲80後嘅新時代女性。佢哋有學識、有事業，又點會睇得起啲低收入嘅打工仔？佢一見啲男參賽者，就問佢哋有幾多錢收入、出入揸乜嘢車以作為評分標準。

陳年寫真 推高人氣

最近有網友翻出佢以前拍過嘅性感寫真，將佢放晒上網，馬諾處變不驚，反而笑說網友愈貼反而會令更多人認識佢。果然，事件一傳開，馬諾嘅名字傳得更快更遠，工作接個不停，更有網站打算搵佢做主播。據講馬諾家陣嘅身價，已經直逼二線女星，所以話：「塞翁失馬，焉知非福」。