過三關 玩速配

活動當日，五位靚女身穿古裝出場自報家門，各人平均22歲左右，之後就由佢哋輪流獻技，盡顯美麗與智慧，台下男士見狀已經拍爛手掌，之後就即場挑選咗幾十人上台過三關。

第一關先嚟武鬥，但唔使自傷殘殺，只係有個師傅出嚟耍幾招，男士們就跟住做，睇吓邊個身手敏捷，喺呢關都叮走唔少雞手鴨腳嘅朋友。

之後就進入第二關文鬥，即係考參賽者嘅急才，主持人會攞啲道具出嚟，參賽者就要用佢嚟形容心儀嘅靚女。呢關最終叮走一半人，因為好多朋友都冇急才，見到道具即時「O」晒嘴。之後到第三關就係考佢哋持家之道，參賽者要替玩具BB換尿片兼着衫，手法最正宗者為之勝出。最後只得五位過關，獲准分別向自己心儀嘅女士表白，結果最後五對都速配成功！