佛山巿南海公安局喺3月31日晚上十點左右大舉行動，前往當地報稱最大嘅邪骨場進行掃黃，行動十分成功，一共拉咗36人，涉嫌賣淫同嫖妓嘅有21人，工作人員就有15人，而今次嘅掃黃行動咁成功，原來全靠一位網友報料。
過萬點擊率
話說30日嘅凌晨一點幾，有位自稱「佛山反黃好巿民」嘅網友，喺網上討論區發咗張帖，聲稱花咗¥2,800，前往號稱南海當地最大嘅邪骨場進行臥底工作，仲將現場多張環境相張貼出嚟。佢話最貴嘅藝人囡囡¥1,200全套，最平嘅小公主套餐則收¥400，呢位網友強烈要求有關方面採取行動。
而呢張帖一登出之後，馬上引起廣泛注意，點擊率高達兩萬幾次，有關方面於當晚就採取行動。
買卡入內偷拍
事後網友大讚公安單位反應迅速，但唔少網友質疑呢位臥底網友嘅居心，更有人話有關桑拿嘅資料喺好多成人討論區都有，要花¥2,800去攞料，一啲都唔值得。
據知情網友反映，該場有一款貴賓卡，只要交¥2,800就可以免12次房錢，相信臥底網友就係買咗呢張卡。而佢亦喺帖上講過，自己當日冇召妓，純粹參觀同偷拍，但呼籲大家千祈咪有樣學樣，話晒做卧底都好危險o架！