位於成都電子科技大學嘅食堂門口有一塊許願板，每年嘅3月7日同8日正係該學校嘅女生節，好多女仔都會將心願用字條寫下再貼上許願板，當中有唔少願望都係想求得一段美滿姻緣。今年一個叫做章萌芊嘅女生亦貼上相同願望，寫住自身條件唔錯，但係好耐都搵唔到男朋友，如果想結識佢嘅話，就可以喺3月11日中午到學校樓下大嗌佢個名，如果合眼緣就會現身見面。

呢個心願一貼出後，好多人將消息放上網，惹來網友發動人肉搜查，發現章小姐原來生得可愛又嬌俏，於是當日就惹來近千人去章小姐嘅學校樓下等候。不過唔知係咪因為咁多人在場，所以只有少數人大叫章小姐個名，可惜最後章小姐都冇出現到！後來校方澄清，是次應為一宗惡作劇，因校內並無一名叫章萌芊嘅女學生。呢個惡作劇引嚟千人圍觀，我諗始作俑者都一定始料不及啫！