日本人氣組合AKB48，人數眾多，一班年輕美少女個個都好「卡娃兒」，想突圍而出，認真唔容易。據了解，喺眾多索女當中，以Team A成員屬精英分子，當中有人氣急升嘅篠田麻里子，以及隊中風頭躉前田敦子，仲有呢次介紹嘅索女小陽菜，佢以性感路線取勝，仲相當受宅男喜愛。
現年21歲嘅小陽菜，樣貌標致可人，身材有番咁上下，而且皮光肉滑。傳聞佢喺高中輟學之後走去參加AKB48隊員招募，從接近8,000人中脫穎而出，成為最後24位入選成員。其後佢頻頻參與電視劇演出，更曾擔正做女主角，算得上係隊員中出鏡率最多之一。
最近小陽菜更推出首本個人寫真集《Kojiharu》，由於係第一次以性感形象示人，所以製作單位特別以佢名字嘅英文譯音嚟命名，可謂別具意義。呢次陽菜仲跟隨攝影隊伍去到沖繩取景，並以比堅尼及性感內衣示人，盡騷美好身材，舉手投足都散發出美少女嘅青春魅力。