本文重點
身體有毛病大家都唔想，萬一不幸患病，為免令親朋好友擔心，患者往往會選擇唔出聲，一個人默默承受，特別係有關性功能障礙呢類令人難以啟齒嘅問題。不過，最近深圳就有一個招聘活動，公開向有性功能問題嘅男士招手，仲用到百萬人民幣代言費，利誘佢哋做代言人！
嚴重陽痿才合格
3月3日，福田區一間醫院門口，派出四個性感俏護士派宣傳單張，而背後就有一道橫額寫住「百萬重金為起勃器徵最無能代言人」！咁出位嘅舉動加上俏護士嘅招徠，引來唔少市民駐足旁觀！
不過，即使自問係無能男士，要成為代言人都唔係咁簡單，因為一定要「形象氣質佳」，仲要係「無絲毫勃起能力的重度陽痿患者」先合格！難怪宣傳時發生咗一段有趣嘅小插曲啦！
話說當時有一位推住手推車嘅老漢準備報名，不過旁邊嘅老伴即刻截住，仲話「你不嚴重」，然後就雙雙離開。老漢是否無能就未知，不過仲推到車，老伴又認為佢問題唔嚴重，咁即係同應徵條件不合，唔報名都係正常嘅！