喺日本聘請女僕嘅人當中，有唔少都係富豪級人物，幾千呎大屋，唔通要自己落手做家務咩！諗起有女僕幫手打掃、洗衫、煮飯，而自己就安坐梳化歎杯靚茶，真係覺得特別有滿足感。不過，以後女僕嘅主人仲可能多一分興奮添！因為日本一間提供女僕服務嘅公司，最近推出一項震驚日本嘅服務，就係光豬女僕喇！

裸得有理

有消息指出，喺美國好多富豪家居失竊事件中，大部分都唔係有賊入屋爆格，涉案人士好多都係保母同家庭傭工，所以搞到當地好多富豪對家庭傭工都唔再信任。有鑑於此，日本一間大型女僕公司Bulter從中吸取經驗，為咗減低富豪家居失竊案發生，特別推出全裸女僕服務，女傭身上有咩財物一目了然，藉此提升富豪顧客嘅信心！

因為女僕一入到僱主門口，就會即刻剝光豬，將衣服手袋放於大門前，然後先開始做家務。Bulter聲稱咁樣做，當女僕見到有名貴首飾珠寶，即使有心想偷，當發覺身體冇地方可以收藏贓物時，最後都會打消偷竊嘅念頭喎！

另類風俗？

光豬女僕嘅上門範圍集中於東京地區，包括涉谷、港區、品川同新宿中心一帶。而服務方面，包括打掃、洗衫、煮飯、洗浴缸等，不過就唔包洗抽油煙機同洗馬桶喎！點解呢？唔係女僕怕污糟，而係因為進行上述兩個清潔程序嘅時候，少不免使用帶有腐蝕性嘅清潔劑，裸體做清潔，一個唔小心整親就大件事喇！

不過，想幫襯咁誘人嘅光豬女僕服務都唔係咁容易，因為需要先入會，而且Bulter仲限制會員人數為200人，想入會就要快手喇！另外，收費方面亦唔係人人畀得起，事關每2小時服務，收費為¥52,500，兌番要成HK$4,500，喺香港請個菲傭做一個月都唔使咁貴啦！而正因為呢個價錢貴到同幫襯風俗店差不多，加上Bulter公司嘅招聘女僕條件仲寫住「裸體模特兒及具風俗經驗女性有特別待遇」，所以就令人懷疑光豬女僕其實係另類風俗服務，至於係咪掛羊頭賣狗肉，我哋就放長雙眼睇啦！