剝衫助「興」

湖北有幾發達我唔知，但據講當地近年樓價急升，情況就拍得住近日元朗某新盤，咁我諗大家都估到有幾誇張啦！講番湖北呢個樓盤，報道指樓盤全屬現貨豪宅，即買即住，但冇透露呎價，之不過呢啲都唔重要，最值得關注係新盤開賣當日，大會就邀請多位自稱人體模特兒嘅索女前嚟剝衫助「興」！

網民喝倒采

當日發展商喺樓盤花園平台舉辦人體模特兒攝影比賽作招徠，發言人表示此舉是為表達呢個新樓盤同人體一樣咁靚，融入大自然中嘅獨特概念。模特兒一出場，經已剝光豬，「龍友」及攝記即時舉機喪影，而模特兒亦非常識做，喺花園、泳池以及樓層內不同位置，擺出高難度動作任人拍，果然專業！

現場有口痕友仲問：「究竟啲人嚟睇樓定睇女？」消息一傳到網上，同日已突破過百萬人次瀏覽，證明發展商呢鑊攞晒彩。不過網民嘅反應就一面倒喪插發展商濫用藝術之名宣傳，手法低俗，有網民笑言：「既然都剝晒衫，不如向阿公申請做紅燈區仲好啦！」