當記者會時間一到，突然成隊人操出嚟，每人手持標語牌，大喊口號，似十足示威遊行，但見牌上寫住「性感無罪」、「和諧最大」嘅標語，應該又唔似係示威喎，究竟搞邊科呢？

性感無罪

後來連五位負責人也全部戴面具示人，當記者以為係鬧劇，準備走人之際，真正嘅戲肉出場，六個身穿性感比堅尼嘅靚女，手持大木棍，喺會場表演製作「糍粑」嘅技藝。講真呢六個靚女，身材夠晒惹火，但整「糍粑」嘅技藝就認真麻麻，雞手鴨腳咁，但由於夠晒青春活力，所以都謀殺咗唔少菲林。當靚女們舂到手仔軟，負責人就向記者宣稱，以上種種都係「行為藝術」，而主要目的，就係為商場嘅春節活動做推廣，搞搞新意思。

行為藝術

搞咗咁耐記者們終於明白，原來係某商場請嚟一幫藝術界嘅朋友，為春節活動加添新意思。藝術家決定將藝術與生活、傳統、民俗相互結合，創出一系列嘅節目，而美女打糍粑，更係活動嘅重頭戲，佢哋會將打好嘅糍粑同現場各人分享，增添節日氣氛。

報道出街後引起網民熱烈討論，有人認為幾有新意，但亦有人大力抨擊，話過年過節一家大細行商場，叫幾個性感比堅尼女郎喺度整糍粑賣弄性感，簡直就係教壞細路，仲強烈要求商場取消活動添！