裝修有特色嘅酒吧，不但可以令客人玩得有Feel，更容易令人留下深刻印象，返轉頭幫襯嘅機會都大啲。就好似呢間位於尖沙咀棉登徑嘅「Athena 22」咁，充滿古典藝術美感之餘，又不失時尚氣息，係三五知己把酒談心嘅好地方。
藝術氣息
呢間清吧嘅裝修，有別於一般酒吧，有不少仿古裝飾，例如牆壁上嘅浮雕，以及飛鏢機附近嘅大型神殿式柱躉，當你置身其中，可感受到一份古希臘藝術氣息。
吧內除咗設有獨立卡位之外，更設有可供20人坐嘅U形梳化區，約埋成班朋友嚟開派對就啱晒喇！據知酒吧更不時會搞BBQ或各類派對活動，想了解詳情，不妨向工作人員查詢啦！
特飲推介
左：Tiffany
成分：咖啡酒、Frangelico、士多啤梨酒、忌廉、奶。
短評：飲落口感似沙冰，味道酸酸甜甜，相當易入口。
右：Mojito
成分：白冧酒、青檸、薄荷葉、梳打加糖水。
短評：為古巴著名嘅雞尾酒，入口帶有酸甜味道，仲涼透心添。