本文重點
以前內地掃黃，有關方面定好日子地點，夠鐘就會操兵過去，邊個唔好彩就拉邊個，後嚟嫌效果唔好，就開始玩突擊檢查。但好多色情場所都廣布線眼，見邊間派出所叫晒啲人返去，就知道有行動，於是一早有晒防備。而喺重慶地區，自薄書記上任以來，都一直致力反貪打黑，佢嫌呢兩招唔夠力水，於是就學香港咁，派警員進行臥底放蛇行動。
跟廣告掃蕩
除咗搜集色情場所嘅犯罪行為外，仲希望連幕後涉案主腦都可以繩之於法，最近就開始見到成效，重慶巿內多間色情場所被警方一一搗破，除咗妓女同嫖客之外，連幕後老闆都被緝捕歸案。
除咗派臥底之外，色情場所會利用短訊嚟吸引顧客光顧，於是有關方面就諗到用截取短訊嘅手法，收集色情廣告嘅資料，按內容顯示進行掃蕩，令不法之徒無所遁形。
由於呢兩招成效顯著，如果鄰近省巿都倣效嘅話，咁大家以後北上就冇運行喇。仲有，記得咪亂發短訊叫老友去乜乜場玩，隨時告多你一條發放色情廣告短訊罪，無端端坐十五日監就唔抵啦！