人嘅舌頭究竟有幾長？古人話三吋，其實一般人嘅脷係有五至六吋長，但可以伸出嚟嘅只佔好小部分，有時真係連三吋都冇。不過有啲人竟可以伸到條脷好長，甚至輕易掂到鼻尖，而古相書就話：「舌至鼻頭，拜相封侯。」即係話就算本身出身寒微，但都有能力拜相封侯，喺現代冇丞相、冇諸侯，所以用於現代，就係指特別專業嘅人或者喺行業中有一定江湖地位嘅人。條脷生得長嘅男人，本身有一定才華，但同讀書多少冇關係，可能係靠一門技能取得成功。