內地最近為咗打擊手機網絡嘅色情資訊，於是聯合九個政府部門，搞咗個「掃黃打非」嘅行動，近日陸續搗破多個色情網站。執法部門起初以為罪犯都係社會上嘅壞分子，而且組織嚴密，但經過個多月嘅調查，竟發現涉案嘅全部都係年輕人。
年賺八萬
就好似內地《揚子晚報》日前就有單新聞，話南京警方經過個多月嘅部署，終於搗破一個經營咗一年多時間嘅手機色情網站，由於伺服器設置於海外，調查有困難，但最終都畀有關方面勾到線，知道終端機設於佛山，於是大舉準備緝捕行動。
南京警方曾多方調查，但都冇收穫，以為背後有龐大組織撐腰，所以今次派重兵親自到佛山展開緝捕行動，最後喺小區單位內，只拉到一名十八歲青年。青年承認一切控罪，包括經營、下載、儲存、發放色情資訊，並從中取利，一年內賺了八萬多元。
註冊容易
疑犯表示從同輩好友口中得知，開辦呢類網站十分賺錢，而且成本低，花一蚊就可以註冊一個域名，之後再花二百蚊喺網絡供應商度租一年服務器，咁就可以賺錢。而色情照片，全部都係於網上下載，一分錢都唔使花，有人下載就有錢收。
除咗佛山嘅例子，近日搗破嘅色情網站，全部由年輕人負責，背後冇組織操控，有部分疑犯更係大學生，終端機就設於大學宿舍內，令人嘩然！