家陣治安唔好，唔少靚女都想學番一招半式，當遇到壞人時可以自衞，冇事就當Keep Fit。美國就有搏擊學堂，針對呢班靚女所需推出「搏擊自衞班」，教授自衞防狼術。
一舉兩得
呢間位於美國邁阿密嘅搏擊學堂，一直以嚟以招收熱愛搏擊嘅男性會員為主，但近期就推出一個名為「Fighting Tips - Girl Boxer」嘅課程。據課程負責人表示，呢個課程專為女性而設，除咗透過練習搏擊術嚟達至纖體效果之餘，更可讓女士學識自衞術傍身，面對壞人時就識得自保。
度身訂造
課程內容除包括一般嘅肌肉鍛煉、技擊訓練外，仲有對招練習。原來負責人認為，不少女性喺面對危急關頭時，往往極度驚慌而唔識反應。對招可提供實戰機會，讓女士可預習於面對危險時，應該點樣處理。可能有女士擔心，學搏擊術會令肌肉線條變粗，而負責人亦考慮到呢點，故此技擊動作及整套訓練，都係為女士們度身訂造，絕對唔會令女士練到變大隻佬！