近期出現咗好多有關環境問題嘅新聞，例如係北極冰川融化，令陸地嘅灰熊公可以行到去北極，一嘗北極熊乸嘅體香，估唔到灰熊同港人一樣咁熱中北上，不過亦令人意識到如果再唔好好保護環境，問題可以變得更嚴重，而回收再造正係其中一個保護環境嘅好方法。
不過，最近上海就出現咗一個另類回收站，佢唔係收垃圾，而係收單身嘅剩男剩女，令人嘖嘖稱奇！呢個人肉回收站冇固定舖位，只得一個男人手執一大張紙，上面寫住：回收剩男剩女，仲話響應國家號召，提高人口質量，更加會利用屬於高科技嘅基因分析技術，幫大家搵老婆、老公添！
然而，睇清楚啲就知道佢原來係幫一間徵婚公司賣廣告！但係，咁樣做人肉宣傳板都算幾有創意兼有噱頭吖，至少有人留意先啦！