尖沙咀金馬倫道一帶有唔少上樓吧，有時喺一幢商業大廈之內，可能有成十幾間吧都唔出奇。由於多數係斯文場，所以零舍受白領人士喜愛。今次幫襯嘅上樓吧「Nirvana」，裝修格局簡潔舒服，獨立梳化位、VIP房及飛鏢機等基本設備都有齊，雖然場內人氣十足，但感覺唔算太擠迫，最重要係場內有唔少女拳手同大家一齊玩。

口甜舌滑記性好

期間有個叫阿Ling嘅拳手，主動走埋嚟撩我玩大話骰，當然冇問題啦！唔知點解，娟娟發現呢個女仔好Talk得，無論係乜嘢話題，都搭得兩嘴，仲要口甜舌滑，好識氹人開心！Ling就話：「大家落得酒吧，無非都係想開開心心咁玩番晚，做拳手嘅梗係要落力啲啦！」

Ling（左）及Fanta都係酒吧內至受歡迎嘅拳手，Talk得、猜得又飲得。

拳手Ange十分健談，同客人乜都傾得一餐。

除咗健談之外，拳手Fanta就話記性都好緊要，佢解釋：「酒吧入面一晚有咁多客人，能夠記住佢哋嘅名，可以令客人有被重視嘅感覺，對酒吧更有親切感！」唔知我下次再落嚟，Fanta會唔會記得我呢？

o靚模落吧行貓步

提吓大家，呢間酒吧將於明晚（11月24日）舉行「特別節目」，由四位性感o靚模輪流上陣行「貓步」，施展渾身解數，有興趣嘅記得早啲去霸番個靚位喇！