唔少朋友都想知道邊間酒吧多女幫襯，而小記呢次介紹嘅酒吧，除咗經常搞Function及有獎遊戲外，更出晒名多靚女出沒！呢間位於尖沙咀嘅「Cash Club」，面積頗大，環境乾淨企理，內裏嘅霓虹燈令酒吧顯得更有格調。場內設有多個區域，仲有獨立梳化卡位，為客人提供更充裕嘅私人玩樂空間，場內更有多間附設卡拉OK設備嘅VIP房，而喺吧頭側邊則有一個小型舞池，客人可盡情跳舞！
活動多多
呢間吧逢星期三、日都有「Ladies' Night」，而今個月逢星期五更會舉行大話骰比賽，負責人表示，於本月二十七日就會進行決賽，勝出嘅客人將獲得豐富獎品及現金獎作鼓勵。此外，為答謝街坊支持，酒吧仲會不時搞優惠活動嚟回饋客人添！
吸引靚女
搞咁多花臣，無非為咗令客人經常有新鮮感，可能因為呢個原因，零舍多女性客人落嚟玩。唔知佢哋覺得呢間酒吧有乜優點可以吸引到佢哋經常落嚟玩呢？
TT話：「我鍾意佢Function夠多，今次個大話骰比賽，我都有參加，仲入咗決賽，到時我會全力以赴，Friend都冇情講！」
程程就話：「呢間酒吧嘅價錢比較大眾化，就算周末假日都唔算太貴，啱晒我呢亭知慳識儉又鍾意蒲吧嘅女仔。」啲客講到咁好，等我又介紹啲朋友嚟玩吓先！