美國有間名為Devil District嘅艷星經理人公司，早前推出一項特殊服務，讓旗下艷星兼職做畫模，方便畫家搵到高質靚女做模特兒，畫人體寫真。

兼職搵銀

有關公司嘅公關經理表示，呢種做法除咗方便畫家搵模特兒外，仲畀到艷星喺拍四仔之餘，多條賺外快嘅途徑。

至於收費方面，一般艷星嘅收費為每小時三十美元，折合約為二百二十五港元，而較有名氣嘅艷星則為每小時一百美元，約為七百五十港元。計埋艷星嘅名氣，其實相當抵！不過大家唔好以為，艷星喺畫畫之餘，仲會提供「額外」嘅服務。事關公司嚴格規定，艷星只能進行畫模工作，唔可以有出軌嘅舉動。

高質紅星

對於畫家嚟講，則相當支持呢種新服務。有畫家認為，艷星有別於一般模特兒，由於佢哋慣於喺鏡頭前裸露身體，唔會怕醜又唔怕露出重要部位，最重要係態度相當合作，加上價錢比坊間嘅畫模平超過一半，有助佢哋節省成本。

另外，有畫家更認為，艷星有着相當嘅知名度，如果將佢哋玲瓏浮凸嘅身材，融入畫紙上嘅話，更有助提升畫嘅價錢，對佢哋嚟講更係有實質嘅意義。