約朋友落吧傾偈,我鍾意揀棉登徑一帶嘅斯文場,環境舒服又企理。嗰日仲畀我見識到一位Bartender嘅拋火樽絕技,真係好犀利呀!
公然玩火
當晚我哋去咗「Living」飲嘢,呢間清吧氣氛好Moody,好啱傾心事。同經理阿新吹水時,佢話吧頭裏面嗰個型男Bartender拋樽好掂,問我有冇興趣睇吓。我心諗,冇乜出奇啫?點知突然間,見到吧頭位置火光熊熊,唔通火燭?正當娟娟想大叫救火之際,先發現原來係Bartender表演緊「拋火樽」!
拍案叫絕
呢位Bartender叫阿Chris,我見佢將沾有烈酒嘅紙塞入一個長頸酒樽,點火後就開始玩花式拋樽,非常厲害,唔少客人拍案叫絕,高興到痹。
問番Chris先知,原來佢嘅拋樽技術係自學番嚟,大概學咗三年幾,平時多數靠上網睇片或睇碟偷師,然後不斷練習,終於練得一身好「武功」。至於咁危險嘅拋火樽玩意,正係佢嘅強項之一。雖然睇落好有型,但我勸喻大家咪亂試,唔小心燒親就掃興啦!