待客有禮

Bobo係尖沙咀鳳凰吧嘅拳手，睇佢斯斯文文，成個學生妹咁，真係唔係好似。而且佢唔會為咗增加收入，而不斷撩客人劈酒，反而會當客人好似朋友咁，陪佢傾吓偈。

雖然Bobo只係喺呢度做咗兩個月，但已經識落唔少熟客，同其他同事嘅關係亦好好，老闆對佢嘅工作表現更係讚不絕口。究竟佢有乜嘢本事，可以咁得大家歡喜呢？Bobo話：「其實我冇刻意討好人，只係覺得待人接物要八面玲瓏，最緊要有禮貌同保持笑容，咁人哋對你嘅印象分都會高啲啦！」

相處融洽

此外，Bobo亦係一個好勤力嘅女仔，除咗陪客人猜枚飲酒之外，佢仲會主動幫忙其他同事，執吓枱、拎啤酒、落Order等，呢啲睇起嚟雞毛蒜皮嘅工作，其實對於經常做到唔停手嘅酒吧侍應嚟講，真係可以幫輕好多o架！

雖然大家都對佢評價甚高，但Bobo仍然謙虛咁話：「都係舉手之勞啫，大家一場同事，應該互相幫忙嘅，況且出嚟做嘢最緊要開心，幫吓人手又唔會蝕底嘅，冇咩所謂啦！」Bobo份人咁Nice，唔怪之得啲同事同客人都咁鍾意佢啦！