揀牌有技巧

早幾日喺尖東Athena22，遇到幾個靚女，我哋幾啱傾，仲一齊玩遊戲。我就介紹咗佢哋玩呢個「啤牌疊羅漢」。首先預備空酒樽一個，以及啤牌(或UNO)一副，第一張啤牌平放喺樽口頂位，然後再逐張逐張咁加上去，但唔可以放喺同一位置，而要順時針或逆時針方向咁放，當啤牌愈放愈多，就會形成「啤牌樹」。由於上面「啤牌層」嘅重量並不平均，所以當玩家繼續放啤牌上去，「倒塌」嘅機會自然大增。

Francis：「咪使旨意贏我！」Jenny：「有人出茅招呀！」	輸咗即罰紅酒一杯，真係幾甘o架！	大家咁老友鬼鬼，輸贏都冇乜所謂啦！

靚女Hena表示，呢個遊戲嘅難度在於定力要夠好，而啤牌嘅選擇亦會有影響，例如使用比較輕身、膠面嘅啤牌，就會好易跣落嚟；相反，改用UNO嚟玩，由於牌身較重，玩起嚟就會冇咁易冧。

遊戲名稱：「啤牌疊羅漢」

懲罰方法：如有啤牌跌落，即罰一杯紅酒。

技巧：★★★★

定力：★★★★★

刺激：★★★★★

(以五★為最高)