但家陣就唔同喇！中國好多農村都迅速發展成先進城市，而當地人嘅思想亦改變咗好多，當然嗰啲村姑亦唔例外，不但變得愈嚟愈識計數，有啲仲醒目到識諗計呃番港男轉頭，好似B君就畀個湖南妹玩到謝，畀人呃咗成副身家都唔知咩事，到發現時對方已經人間蒸發。

貪得無厭

話說B君喺香港從事貿易生意，都算有米之人，佢不嬲都好少主動去蒲，多數係朋友邀請先會出席吓。

有一次，佢跟朋友北上玩樂時，識咗個湖南妹叫小紅，佢對女方一見鍾情，而呢個女仔亦好快答應同B君一齊，之後兩人喺深圳租咗間屋，雖然B君確實真心鍾意小紅，仲好希望同對方結婚生仔，但最弊係由始至終女方都唔係咁諗先慘，只想搵一筆就走人。

收錢鬆人

喺拍拖期間，小紅不斷向B君提出要求，除咗錢之外，仲有名牌手袋同首飾，而性就係佢嘅交換條件。

表面上小紅係B君嘅女朋友，實際上同一個畀人包起嘅女仔冇乜分別。大概一年後，小紅就話自己大咗肚，威脅B君要畀一筆錢佢，如果唔係就唔要個BB，一心同小紅過人世嘅B君一時心軟，結果將自己辛苦儲落嘅十幾萬銀身家畀晒女方。然而，小紅攞咗筆錢後態度即時變晒，留低張字條話有急事返鄉下就走咗去，睇怕佢已經搵到另一個好碼頭泊喇！老實講，呢亭女仔唔係為咗錢，唔通會因為你對佢好而咁易受溝咩！