燒銀紙 為氹女

講番當年香港嘅妓寨，當中以「大寨」為最高級，等同今日嘅富豪級夜總會，故此光顧嘅客人都屬非富則貴。既然係有錢人嘅尋歡「性」地，除咗客人玩得豪、使錢使得勁之外，連妓女都特別有性格，唔係話你畀成呎厚嘅銀紙出嚟，佢哋就肯同你上床！

據悉當年所有妓女都要同衙門登記，明文規定「大寨」嘅「夜渡銀」（即係過夜費）為三両六銀，按照當年七分二厘銀，等於一毫子嘅話，想同「大寨」嘅紅牌姑娘曳曳，便起碼需要五蚊。

雖然五蚊對當時嘅有錢佬嚟講，唔係乜嘢大數目，但如果小姐第一晚見到客人，便收五蚊同佢上床嘅話，便有種自貶身價之嫌，故此冇妓女肯就此提供服務。

既然如此，如果客人想一親心儀妓女香澤，又有乜辦法呢？除咗必須請妓女飲飲食食（俗稱「執大房」及「打茶圍」嘅燒錢攻勢）外，另外各種禮物首飾亦唔少得，直到同妓女建立一定「關係」後，才有機會發展進一步「友誼」。由此可見，「大寨」唔單止係有錢佬尋歡作樂嘅地方，仲係身份及地位嘅象徵。

低下層 玩即食

如果使唔起咁多錢嘅話，則可以退而求其次，去次一等嘅「半私明」同「二四寨」。除咗所有排場及規矩，冇大寨嚟得咁繁瑣外，見啱心儀嘅妓女，不但可以接佢一齊飲花酒、抽吓水外，當玩得性起時，更可以就地正法，入房尋歡去也，而呢種玩法俗稱「乾屍收殮」或「即席揮毫」。

雖然呢種即買即食嘅玩法係正，但當年嘅玩家卻唔係咁認為。事關喺佢哋眼中，認為用錢去煲女，先至夠格調，因此只有較低層次嘅人先至會去幫襯。其實當年嘅塘西風月仲有好多規矩，有機會嘅話再同大家細說當年啦！