突擊巡查

另外，有內地老友報料，深圳各區派出所嘅公安除咗晚晚加班外，更加強人手，每晚都會大舉出動，巡查各大小夜場，更會跨區突擊巡查，即係唔聲唔聲，突然到場巡查，令夜場負責人防不勝防，殺佢一個措手不及。

所以家陣一入夜，深圳一啲橫街小巷都變得水盡鵝飛，只得啲大場，例外夜總會或者休閒中心仲有開門做生意，但都只係提供正經服務。有口痕友話今次嚴打咁認真，可能同新官上任三把火有關，所以呢次嚴打一定要加大力度，做啲成績咁話。

冇晒囡囡

至於夜場方面，佢哋好似早就收晒風，如夜總會冇晒三陪嘅囡囡，只有DJ妹喺度打碟，客人亦唔敢亂嚟。而桑拿同休閒中心，就全面禁止技師喺場內提供特別服務，但如果客人有需要，佢哋就安排技師同客人出街搞掂，當然房錢由客人自付。

據知，由於大場合作，細場收斂，所以今次嘅掃蕩行動比較風平浪靜，而有關方面會主力打擊犯罪集團、賭博同毒品，尤其係對吸毒者，更會絕不手軟，一旦搜出身上藏有毒品，即時扣留兼罰款。所以家陣大家北上去玩，都係要小心啲，唔好亂嚟，否則被人拉咗要踎監就麻煩啦！