有機食物，簡單嚟講，係指一啲利用有機方法種植同培養嘅食物，例如菜種本身冇經過基因改造，種植時亦要用天然肥料同天然驅蟲劑。至於飼養牲畜亦一律放棄激素催生，以及有基因改造成分嘅飼料。雖然未知有機食物係咪真係比其他食物營養更豐富又易吸收，但係就冇農藥、冇激素，所以好多人都認為有機食物更為有益。最近，日本就出現一間主張促進男人健康嘅有機風俗店，有機嘅意思並唔係指裏面嘅風俗孃個個都奉行有機方法飲食主義，而係每個風俗孃都會安排客人透過有機生活促進健康，更加標榜以挽救男士生殖能力為目標。風俗孃更絕對唔會見錢眼開，只顧快快與客人完事，然後收取報酬就講聲拜拜走人，實行要令客人玩得開心又健康！

專業培訓

任何人都唔可以未學行、先學走，踏入每一個行業都需要經過一段時間作培訓，咁先可以鍛煉有水準嘅技能提高工作質素。而一般嘅風俗孃，例如係陪浴孃，要培訓佢哋可謂一絲不苟，先由資深陪浴孃教授技巧，再嚟就要實地視察前輩點樣服侍客人，之後仲要經過測試先可以成為正宗陪浴孃。

而呢間有機風俗店旗下嘅風俗孃同樣要經過嚴格訓練，然而招呼客人嘅技巧只係其中一個範疇，教授有關健康飲食習慣、營養學知識、健康推拿手法、穴位按摩等等，甚至連中醫嘅面色觀察都要略懂一二，因為咁樣，風俗孃先可以判斷到客人嘅健康狀況，提供最有效促進健康嘅方法，令佢哋幫襯本來唔健康嘅風俗店服務都可以變得身體健康！

一站式服侍

相信大家近年都被有關纖體瘦身嘅廣告轟炸到麻木晒，亦了解到好多纖體公司都標榜一站式瘦身服務，有專業營養師幫客人做一系列身體檢查，再度身訂造減肥餐單，然後再由導師教授減肥運動，並有美容師安排各種嶄新科技推脂、消脂、爆脂療程，服務相當完善。

而有機風俗店嘅服務同樣係一站式，經過專業培訓嘅風俗孃會同客人嚟一個面對面傾談，了解客人嘅身體狀況、飲食習慣等資料，然後風俗孃就會根據情況安排有機飲食餐單，大家可能會問：「家陣幫襯風俗孃喎？唔係愈快入閘愈好咩？仲邊有咁好閒情逸致傾偈呢？」大家唔好成日都咁心急洩慾啦！話分兩頭，其實有好多男人都希望身體健康，更希望喺床上能夠虎虎生威。既然家陣幫襯有機風俗店有機會令身體更加強壯，甚至改善性能力，對男士嚟講當然更好啦，花多少少時間同風俗孃傾兩句又有乜所謂吖！

有病都幫襯

前文提及到，幫襯有機風俗店嘅客人當中，有唔少都受到性能力問題困擾，而受到呢種問題困擾嘅男士除咗普通人之外，亦有久病在床嘅病人！有機風俗店為咗開拓客源，除咗做普通男人嘅電召出張服務之外，更加將客路擴展到病人。

部分病人因為長期服藥、缺少運動等問題，自覺性能力下降，所以就會電召有機風俗孃直入醫院，為佢哋提供一連串服務，用健康飲食以及聲稱能夠令男士雄風再現嘅推拿按摩，令自己再次生機勃勃，唔使再做頹男！當然，風俗孃再大膽都唔會喺醫院同客人搞三搞四，所以床戰嘅場地當然係附近嘅時鐘酒店啦，不過要令醫生肯畀病人放半日假出院都唔係容易㗎，幫襯前都係諗清楚至好！