好多女性曾經夢見啲光怪陸離嘅性愛場面，呢啲綺夢其實或多或少可以反映出個人心理狀況。不妨參考以下內容，話唔定可以幫到各位姊妹㗎！

失去信心

相信唔少女性都曾經夢見伴侶偷食，呢個夢的確會對女性造成異常沉重嘅憂慮，原因好多時係因為缺乏自信或曾經受過傷害所致，亦可能係女性曾經多次畀男性拒絕，久而久之對自己失去信心，就算日後得到愛情，過往陰影依然冇辦法消除，經常擔心夢境成真，害怕失去伴侶。

其實如果喺現實生活中，伴侶根本冇對你做過一啲不忠嘅事，咁就應該盡量放鬆自己，同時跟伴侶多作溝通，互相了解多啲，心中恐懼自然會慢慢消失。

反映自我

夢見自己與同性相戀，又或者跟同性有親密關係，可能會令人懷疑自己嘅性取向。不過，各位姊妹可以放心，因為根據心理學家統計，呢種其實係女性最常做嘅夢。夢中嘅同性戀伴侶，其實正正係你自己理想形象，夢入面，呢個同性戀密友令你得到快樂，而佢身上各個優點，正係你自覺欠缺嘅地方。

至於呢個夢嘅啟示，係夢中反映出另一個自己，喺佢身上所有嘅優點，其實係你本身欠缺嘅一切，不妨採納佢嘅優點，然後思考一下點樣改善自己嘅缺點，取長補短，現實中你自然能加強自信心。

壓抑過度

女性夢見自己畀人侵犯，甚至畀人強暴，當然會覺得恐懼，但同時間竟會有心情去享受快感。而瞓醒之後可能會擔心自己係咪變態，其實呢種心態並唔係心理上有問題。原來當一個人過度壓抑性需要，就會好易發呢種夢，現實中明明好想要，但唔敢向伴侶提出，覺得難以啟齒，結果就惟有喺夢中發洩出嚟。

如果你本身係一個極之保守嘅人，做呢種夢一啲都唔出奇，平時對性需要過於壓抑，好易令男伴覺得冇癮。要知道性生活對提升男女關係佔有好重要位置，性生活愉快嘅人，跟伴侶關係都會好啲！各位姊妹，盡量放開懷抱，嘗試從現實中享受性愛啦！