包枱有女陪

由於當時有錢嫖客講求面子，重排場，一枱人包括主家及陪客，每人身後均有一位以上「阿姑」（妓女）才顯得「架勢堂」，若然沒有「阿姑」陪伴，好易會被酒樓侍應及酒客譏笑，有女有酒，三五知己圍埋一枱，通常呢餐飯起碼食到凌晨，散席後就由酒樓坐人力車返回妓女所屬妓寨，然後嫖客同妓女吹吹水，飲飲酒，食吓生果，就稱為「打水圍」或「打茶圍」也！

假如嫖客想進一步做「一夜夫妻」，當然要大灑銀両，若財力不足，「打水圍」後就得離去，這就是水坑口大寨妓女日常生活的寫照。至於「打炮寨」就更明買明賣，付銀之後即場「開波」，即現代人講嘅「食快餐」也！

廟街「打水圍」

據講本地最後一個「打水圍」嘅地方就係油麻地廟街，七十年代，當時有錢嫖客興落舞廳跳舞追舞女，但舞女唔一定會賣身，同你跳到興合合可以選擇唔去馬，一般打工仔要「出火」多數到廟街一帶，因為該處保留「打水圍」作風。

但呢個所謂「打水圍」同舊時塘西嘅「打水圍」有所不同，因為廟街妓寨多是開設於三、四樓，嫖客要走好一段樓梯，在電梯未普及時，當時的人雖不當一回事，但夏天要走數十級樓梯，自然會出汗，到妓寨後，不論是否光顧，妓寨都會送上一杯茶或水供他們喝，嫖客一邊喝一邊打量在廳內的妓女，通常有五、六個，「打牙骹」合意後就入房交易，這就是那年代的「打水圍」。