男人如果眉頭又緊又窄，特別係老人家，喺古相書嚟講，注定係勞碌之相，一世冇發達。眉毛係主貴人同兄弟幫忙，印堂只宜寬闊，等多啲貴人同兄弟嚟幫忙，但如果眉頭緊閉，印堂狹窄甚至出現直紋，咁樣想有貴人兄弟嚟幫你都幾難。
而且男性眉頭緊閉，喺性格上，係屬於過於小心謹慎，太過於墨守成規，凡事都唔敢有所突破，於是喺工作上，只懂得按部就班去做，喺政府部門打工都勉強可以，但喺私人機構，就一定得唔到上司同老闆嘅賞識，升級冇份，裁員則往往係第一個。
正常情況，男人年紀愈大，見多識廣，眉間會愈來愈寬闊，但如果相反嘅話，證明你一世都唔會發達之外，呢種人亦唔會生活得太過開心，連帶夫妻生活都唔會協調，性生活都唔會太愉快，所以夫妻運亦會較差，唔係經常吵鬧，就有機會離婚收場。