呢個世界光怪陸離，乜嘢都有可能發生，好似畀錢叫人打你一身，打完之後仲要好興奮，咁無稽嘅事唔知大家又聽過未呢？喺美國就有間拳館，專門招呼身痕又無聊嘅男士，叫班靚女對佢哋拳打腳踢一番，打到佢哋變豬頭後，仲要大叫過癮，係咪有被虐傾向呀？
其實呢間位於美國佛羅里達州嘅拳館，表面上係畀女性學習拳擊嘅地方，查實內裏提供一種名為「火辣粉拳」嘅特殊服務，專門招呼有另類癖好嘅男士。原來有部分男士，甚為享受被靚女糟質嘅滋味，認為咁樣能夠激發佢哋嘅慾火。拳館有見及此，便讓有需要嘅男士充當沙包，既讓有需要嘅男士得償所願，又能順道讓女學員練拳。
雖然玩法過癮，但想試吓拳拳到「慾」嘅滋味卻非易事。事關拳館為免有人受到不必要嘅傷害，只會招呼特定嘅男會員，而事前更要先經過醫生嘅同意，先至可以得到呢種特別服務。另外，呢種服務收費亦不菲，每局三分鐘便要一百美元，折合約為七百八十港元，仲嚴禁男會員對女學員有親密接觸。畀錢叫人打自己一身，如非好此道者，相信唔會有人願意貼錢買難受。
收費：每局100美元
注意事項：雖然好此道者一啲都唔介意畀靚女打，但呢啲激烈嘅運動，始終有機會受傷，故此喺享用呢種服務前，最好先經過醫生檢查，從而避免不必要嘅風險。