據專家調查所得，不少派對玩家都鍾意白色，除咗因為白色有浪漫感覺之餘，亦有和平同愛嘅意思。加上白色衣服喺的士高嘅燈光下，會泛出紫色嘅迷幻效果，因此深受玩家歡迎，而呢個派對為咗帶出「愛與和平」嘅主旨，便決定以白色作為賣點。
愛與和平
其實呢類白色派對，已經出現咗一段日子，從○二年起至今，已經係第七屆舉行，而且每次都吸引眾多玩家前來玩樂。正如其他派對一樣，呢個派對亦有另一個主題，就係「愛與和平」。
問及派對負責人James，舉辦白色派對嘅原因，James解釋：「其實啱啱開始嘅時候，呢個只係一個供朋友參加嘅小圈子派對，等班朋友喺私人環境下，盡情玩樂。為咗讓派對更具特色，有朋友便提議不如用白色作為派對主題，既能增加浪漫感覺，又能突出愛同和平嘅內涵。」
派對主題中所指嘅愛，其實係指每個參加者，都能夠表現博愛嘅精神。讓James估唔到嘅係，呢個派對竟然深受玩家嘅歡迎，喺不斷有新人加入嘅情況下，漸漸地變成大型派對。為咗能夠令玩家保持新鮮感，大會更不斷喺派對中加入新元素。
隆重扮相
大會之所以不斷諗計創新，原來係因為佢哋發現單以「愛與和平」作為賣點嘅話，玩家好快就會覺得悶，故此佢哋每次舉辦都有新元素，好讓玩家能夠盡興之餘，亦能提升投入度。以前佢哋曾經加入比堅尼、森巴舞、晚裝等Dresscode，而最近嗰次佢哋索性玩大佢，以化裝舞會為主題，如此一來，蒲友嘅造型會更多變！
所謂嘅化裝舞會，就係大會會要求玩家要穿上一身白色戰衣參加派對外，玩家想做白雪公主還是白馬王子都悉隨尊便。可能有玩家缺乏Styling天分，求其戴個眼罩或面紗就算，但咁樣嘅造型又點夠照呢！故此，大會當晚就提供各種宮廷服出租，更請嚟一眾以法國宮廷禮服扮相出場嘅性感美人，希望做到好似古代嘅宮廷化裝舞會一樣咁隆重。
性感嘅白色宮廷服，不但脗合大會嘅主題，更凸顯出靚女們玲瓏浮凸嘅身材。同時，呢班靚女亦會喺現場同玩家們大玩遊戲，之後更換上火辣舞衣喺台上大跳火辣艷舞。性感嘅白衣慾女，加上撩人嘅性感舞姿，試問男士們又點可能唔盡興而歸呢？
投懷送抱
曾經去過呢個派對嘅玩家Jimmy就話：「呢個派對真係充分表現出『愛與和平』嘅真諦！以前去過嘅派對，經常有人為咗溝女而出現爭拗嘅情況。不過呢個派對卻相當和平，皆因場內嘅靚女多到數唔晒，粥多僧少又使乜爭呢！講到愛囉喎，先唔講大會安排班靚女有幾咁熱情如火，而女玩家亦相當主動，自動埋身唔在講，仲起勢黐埋嚟同你大跳熱舞，呢點就更加抵錫！話說回來，大會安排嘅一眾助『慶』女郎又確實非常火辣。老實講，我咁大個仔都未試過，同衣着咁高貴嘅靚女一齊玩，感覺真係相當新鮮。」
雖然呢個派對十分吸引，但想買飛入場卻非易事。正如James所講嘅一樣，呢個派對主要以招呼朋友為主。如果冇熟人介紹嘅話，好難買到入場券。另一方面，有玩家以為可以喺呢個派對度溝女，繼而攜手共享銷魂。不過James表示，由於派對另一個主旨係講求純真，如果抱住想「洩慾」偷香嘅心態到場的話，可能會感到失望。如果真係想同靚女們有進一步發展的話，唯一辦法就係去多幾次，同靚女們混熟咗，自然較易得手啦。Jimmy笑道：「我都係去咗幾次先至可以同心儀靚女打場友誼波咋！」唔知大家又有冇興趣，參加一個咁與別不同嘅白色派對呢？不過依家人類豬流感於當地肆虐，都係遲啲先再去啦，冇得去玩，睇吓相都開心嘅！