葉尚華（左一）、黃興桂（右二）同馬田泰萊（右一）雖年事已高，但落到場依然有姿勢有實際。
趁尋日英超亞洲挑戰盃空檔，黃興桂邀請隊、居星港移民隊（九龍會）同印度元老隊喺內政聯新訓練場踢咗場三角賽，結果由擁有名譽領隊曾江，教練兼球員黃興桂，傳奇評述員馬田泰萊，球證包臣、摩士同香港名宿葉尚華、譚兆偉嘅黃興桂邀請隊，以1勝1和佳績，力壓九龍會奪得冠軍。
喺尋日嘅比賽，最難得係「老鬼兵團」68歲嘅葉尚華、70歲嘅馬田泰萊、71歲嘅黃興桂喺大勝九龍會之役同時落場，經典合作難能可貴，不過馬田泰萊同兩位球證基於今日嘅英超亞洲挑戰盃都有任務在身，只係踢咗1場就走咗。馬田泰萊話今屆阿仙奴對愛華頓，係近咁多屆以嚟決賽中最強戲碼，梗係要用番黃興桂嗰句金句：有今生冇來世呀！
