正備戰土耳其世界賽嘅美國男籃，雖然尋日同衞冕冠軍西班牙打熱身賽有杜蘭特「上身」，可惜最後只以86:85反勝對手。早前獲沙維同佩奧爾鼓勵嘅西班牙新星盧比奧表現搶鏡，獲得「夢九」上下大讚，相信將成為美國喺世界賽爭標嘅最大勁敵！

為踢多一個球員走，迎合世界賽12人大軍名單，美國「夢九」對西班牙特別收起朗度、路夫同格蘭加，畀韋斯布克、史堤芬居里同艾歷哥頓更多上陣機會。雖然美國全場一直領先，但去到完場前90秒卻一度被西班牙反超前2分，好彩最後憑戴歷羅斯兩罰全中，加上杜蘭特作出兩次關鍵封波，最終以1分反勝西班牙。

杜蘭特戴歷羅斯大讚

除咗兩個封波，「KD」杜蘭特對西班牙仲有25分同10個籃板，不過賽後外間都將焦點放喺西班牙後衞、09年被木狼以第一圈選中嘅盧比奧身上，事關呢位19歲新星，後備上陣21分鐘交出7分、5個籃板、3次助攻同4次偷波。賽後杜蘭特都忍唔住大讚盧比奧：「盧比奧係令人吃驚嘅後衞，控球出色，而且仲成日破壞我哋嘅進攻。」隊友戴歷羅斯更話：「今場波對盧比奧實在係一次極佳嘅測試，我認為佢已經準備好打NBA！」

盼打造西班牙「滿貫年」

由於西班牙係上屆世界賽冠軍，加上西班牙足球隊啱啱捧走世界盃，當地球迷都好希望西班牙籃球隊可以捧走今屆世界賽，打造西班牙體育嘅「滿貫年」，盧比奧更表示早前獲得沙維同佩奧爾鼓勵，美中不足係西班牙啱啱宣布効力速龍嘅大將加特朗拉傷左腳肌肉緣盡世界賽，料由魯爾盧比斯頂替。

雖然贏埋西班牙後，美國喺熱身賽取得3連勝，但球隊實力未如想像中強大，特別係欠缺內線球員，尋日對西班牙更要用湖人大前鋒奧當客串中鋒，如果喺世界賽再遇西班牙，真係未必再贏到。美國尋日已啟程前往希臘，準備喺香港時間禮拜四凌晨，同希臘進行世界賽前最後一場熱身賽，並喺賽後公布12人名單。