政壇：至叻星：高永文 醫保推銷不力 市民一知半解

早前自願醫保計劃嘅諮詢期延長咗一個月到尋日結束，食衞局局長高永文話喺延長諮詢期內反應踴躍，似乎好滿意自己推動醫保討論。但有政黨民調顯示六成受訪市民唔知諮詢期延長咗，超過九成受訪者仲話冇細閱過諮詢文件。雖然民調唔一定絕對準確，但唔多唔少都反映咗某程度嘅民意，即係普羅大眾未完全清楚諮詢內容，換言之，可能只係高永文自我感覺良好，以為各界對醫保反應正面，但實際上宣傳力度未夠，大多數市民仲係一知半解。唔該高永文小心啲去優化個計劃，唔係出到嚟又畀人鬧爆喇。