議員平時返立法會除咗開會外，飲飲食食亦係一件大事。立法會議員蔣麗芸尋日喺網上節目訪問喺立法會擔任管事超過三十年、喺兩個月前退休嘅Tony羅秉義，羅仲大爆議員鮮為人知嘅一面。
Tony話，例如代表中華總商會「IQ博士」黃宜弘做議員時，每逢開大會都會請食薑醋，即使佢已退下火線，但都叫佢嘅接班人Martin廖長江秉承呢個傳統。點解要食薑醋呢？我哋問過幾位議員，佢哋話「IQ博士」出名好客，請食嘢好平常，聽聞薑醋係出自中總會所餐廳，而且好出名，所以佢先會有請食薑醋嘅傳統。
議員多揀擇 管事知口味
任職管事期間服侍過多位議員，Tony對議員們嘅口味可謂瞭若指掌。佢話前立法局主席施偉賢一食味精就會頭痛，所以為佢準備膳食時，都會特別提醒廚房唔好落味精。
咪以為尊貴嘅議員對飲食都有高要求，Tony爆料話，唔少議員好似小朋友咁鍾意食零食，包括朱古力手指、馬仔等，所以佢哋都會準備妥當，等議員開會開到悶時，可以偷懶食吓嘢。潮流興「拉布」，依家議員周不時開會開到好夜，佢哋就會準備纖維餅同埋粥，等佢哋醫吓肚。
雖然管事會盡量滿足議員嘅諸多要求，但唯一唔可以妥協嘅係茶水。會議廳內只可以飲水亦係立會嘅傳統，茶或咖啡等飲品一律禁止。
點解？Tony話當年佢啱啱做管事嘅時候，都有問過點解，但有前輩話佢知，因為茶同咖啡都會發出氣味，如果容許議員喺會議廳內飲其他飲料，可能會影響到他人，所以管事只會喺會議廳前廳準備咖啡同茶，如果議員想頂吓癮，就要移步去前廳喇！
第一手消息請下載on.cc東網
