吳克儉（左）用左手接過紀念品，右「豬手」就同學生say hello。
教育局局長「吳得掂」吳克儉尋日出席一間小學嘅「仿真溜冰場」啟用禮時，發現佢右手腫到豬手咁，仲沾有黃藥水！佢話早前唔知乜事，隻手好痛，連醫生都唔知病因，似係「網球肘」，可能係太操勞喎。佢前日先喺醫院做完小手術，右手手掌仲用紗布包實，只露出手指頭，做乜唔休息吓呀？佢就話太多嘢做攞唔切病假，得番手指公同食指郁得，其他勞動工作都做唔到，所以只能呆呆咁欣賞學生打冰球。
將軍澳仁愛堂田家炳小學舊年四月新增設「仿真溜冰場」，係全港首間小學將冰球融入常規課程，兼有呢個設施嘅學校，已安排三百多名小四至小六生接受冰球訓練。校方成立冰球校隊一年，已經喺三場校際賽事中贏得一場冠軍。成績咁理想，有賴合和實業董事總經理、冰球訓練學校創辦人胡文新，「泵水」四十萬元畀學校添置仿冰場。
胡文新話目前向十七間中小學推廣冰球，曾試探過大學生，覺得佢哋「百足咁多爪」，唔太得閒玩冰球，所以先冇向佢哋推廣。咁又係，大學生忙學運嘛！
第一手消息請下載on.cc東網
