康宏理財服務聯席董事 卓啟雄
【財經組報道】新正頭講「恭喜發財」，除了「講」還要「幹」，想更富有要點做？兩位理財專家以下十二招助你致富，以下招式在任何經濟大環境下、無論個市點走向都適用。羊年新開始，接招！
美國萬利理財亞太區總裁 張佩儀
投資有風險，但唔投資更出事，每年蝕梗4％通脹。
一張圖書證助你找人生第一桶金。
投資愈早開始愈着數，未明？看看香港這幾十年的樓市。
貧富分別可能只在於，半杯水你看到的，是半空還是半滿。
但千祈咪「群」呢啲。你懂的。
第1招：當正自己做CFO
做CFO（財務總監）即是「管數」；要管，首先要知自己盤「數」。張佩儀與卓啟雄同建議使用Excel記錄，列出資產、收入（包括人工與投資）及支出，「漏錢」之處便一目了然。
卓啟雄提示，開支只須記約數，例如「一日食飯搭車用兩百蚊，咁就Mark兩百蚊一日」，太零碎反而浪費時間。
第2招：「抹靚」個人信貸記錄
「理財第一步就要找晒啲卡數」，卓啟雄指出，每筆拖欠的卡數或借貸，都會在個人信貸庫記錄低，拖數或時常僅還「Min pay」，會直接影響他日買樓向銀行申請按揭。張佩儀則提醒千萬勿「無啦啦借錢」，她有個客便借錢買人民幣，人幣跌，兼輸利息；她強調借錢有成本，所以應先儲錢後消費，「點解要分期付款唔一次過畀？呢度供三百嗰度供五百，咁永遠一出糧就無晒錢。」
第3招：要識Cut
Cut開支，並非叫你日日捱麵包「毒」在家中，只需找一項「最無謂、對自己最無幫助」的開支，「戒」一個月，你會發現，有些東西其實無都一樣得。
張佩儀有一位男客人「未出糧就無晒錢」，皆因每月人工三成全用於掃名牌衫。張直指「唔係話唔買名牌，但使唔使用人工三成買？有冇代替品呢？」
卓啟雄則提醒，Cut要Cut對項目。「有個客有儲開錢，近排想買對二、三千蚊波鞋，佢（竟然）想Cut儲錢來買波鞋！其實個Concept應該倒番轉！」即是千萬不要打儲蓄的主意，正確概念是每月收入減去要儲的錢，剩下的才可以用；若想着用剩的才儲，包你一世都儲不到。
第4招：諗多瓣收入
有錢人永不只依賴一個收入來源；收入，並不只得打工那份糧，除了投資和賺外快，「循環再用」一樣得。名牌手袋、手提電話就算二手依然有價有市，張佩儀提議不妨賣出去或「Trade-in」，既環保又增加收入。動動腦，別再被「人工」二字「框死」。
第5招：教曉啲錢自己行
錢點曉自己行？安排自動轉帳就得。自動轉帳是個人理財好幫手，自動自覺替你每月繳交大小帳目，減省處理時間，銀行交易有齊記錄，一目了然；而且一出糧，錢便自動走過去儲蓄或投資戶口，免卻「有錢身痕」。
第6招：趕啲錢出去幫你搵錢
人人都知投資有風險，但不投資其實風險更高。「錢擺喺銀行，保證你每年蝕梗4%通脹」，卓啟雄直言「啲錢擺喺銀行，唔可以就當儲咗錢，最基本要追到通脹。」投資視乎年齡及家庭狀況，20至30歲的年輕人比較多目標要儲，所以建議將三至四成資金儲起。但卓認為股票「上落好大」，建議儲到六位數字才沾手；相反基金就「穩定啲幫你達成目標」，不過要投資五年以上才發揮作用，還要年年審視基金表現。卓自己21歲開始投資月供基金，至今十年，每年平均回報7至9厘。
第7招：投資要夠「悶」
望住股價上落，心情隨之起落並非好事，皆因投資首要冷靜。想尋刺激，經濟學家Paul Samuelson指不如去拉斯維加斯好過。但「悶」不代表只投資於看似風險不高的產品。張佩儀指，投資要有求變心態，跟住市場變，「以為買人民幣四平八穩，可長揸唔理？但舊年突然跌，今年可能再跌；（投資）唔可以一成不變。」
第8招：抓緊秒秒鐘係錢
無錯，時間就是金錢，就算每日儲100元，一年已經有36,500元，所以年輕人尤其要善用時間的優勢。卓啟雄指出：「香港最值錢的投資工具係乜？係樓。但樓市都要經歷二、三十年先會升到咁多倍，八十年代太古城賣40萬，依家要1,000萬，係要時間去增長。」張佩儀亦認為投資愈早開始愈「着數」，「你愈早開始，就愈早交學費，資本少輸極有限度」。
第9招：先照顧好自己
搭飛機聽安全指示，都叫人遇上緊急情況，首先自己戴妥氧氣罩，然後才協助旁邊的人；面對財富及時間亦同樣道理。如果以往每日抽三十分鐘來理財都分身不暇，新一年你需要「自私」一點，花多點時間優先服務自己。張佩儀亦批評時下現象：「情人節冇錢，就碌卡借錢送禮物請食飯，但係爭人周身債，咁就無意思！」
第10招：要慷慨
剛說完要先照顧好自己，現又說要慷慨？對，兩者並無矛盾，我們既要量入為出地去分配自己的時間與財富，亦要有慷慨無私的心，愈富有愈願付出，貧富態度的分別有時只在於，半杯水你看到是半空還是半滿，自覺豐盛，自能吸引財富降臨。好玄？卓啟雄來說故事︰「全北京搵得最多錢嘅的士司機，年薪成100萬。有記者同佢講︰『你就好啦，搵咁多錢一年，見到你成個人好開心』，司機答記者：『其實，可能係我個人開心，先吸引咁多乘客！』」所以慷慨付出，或有意想不到的回報。
第11招：申請圖書證
全世界最富有的成功者有一個共通點，就是愛閱讀。張佩儀指閱讀要多元化，她自己亦「要睇好多書先可以累積到今日咁」，今日她不單讀書，還出書教理財。申請張圖書證，讀多啲書是最直接投資，人生第一桶金，分分鐘就靠張圖書證。
第12招：「群」富有人做Friend
富有人，並非「fb上出貼大晒出海歎Lafite去米芝蓮餐廳食松露」那些；財富不單是錢，家庭、朋友、健康、正面思想等通通都是財富，擁有這些正能量的，才是真正的「富有人」。九十後想買樓，有人講「點會買到吖，一定儲唔到啦，樓價咁貴」，又有人講「由呢一刻開始理財大計，一定得」，你覺得哪個可以上到車？莫看輕朋友網絡的價值，「群乜人，似乜人」。卓啟雄認為思想正面樂觀很重要，他提議不妨和目標差不多的朋友一起計劃，「有多個人同你Work Out，Commitment大咗，目標會易啲達到。」其實要富有，首先由態度出發。
逢星期一至五見刊
第一手消息請下載on.cc東網
