張炳良
收到消息話警方即將就佔領行動展開第三波拘捕行動，雖然涉案人士最終會否被檢控仍係未知之數，但多名佔領重要人物嘅流年運程都可以批算吓。香港術數家協會術數師楊子東批算，學聯秘書長周永康、學民思潮召集人黃之鋒、人稱「搞事四人幫」成員嘅「民主阿婆」前政務司司長陳方安生、「李漢奸」白鴿黨創黨主席李柱銘同佔領行動幕後「黑手」兼「金主」嘅壹傳媒集團前主席「肥佬黎」黎智英，今年都唔多順利，甚至官非纏身。
周一嶽
之鋒有官非 永康大反覆
楊師傅話黃之鋒流年行忌神運，會有大衝擊，今年農曆三月、六月、九月、十二月都容易招惹是非官非，只有農曆七月、八月略順，宜低調。
至於周永康則今年會有貴人之助，但農曆七月同八月就唔多順利，或會有官非，更可能受利器所傷，而到農曆九月最運滯，將經歷大是大非大反覆，一連三個月唔係咁容易度過。
同樣行忌神運嘅仲有民主阿婆同李漢奸，楊師傅預測民主阿婆上半年平凡，但立秋後就小人是非不絕，農曆九月最不利，該月份更人事複雜有爭執，處事卻「雷聲大雨點小」，總結全年無寸進。無他嘅，民主阿婆嘅政治能量同影響力已近乎零，出嚟說三道四都未必有人理佢啦。李漢奸就流年同大運對沖，多勞少成，上半年不吉利，農曆九月特別多是非小人，會有驚險喎。
抽水肥佬黎 秋後運勢弱
至於在佔領行動期間經常到金鐘佔領區「皇座」扮指揮抽水嘅肥佬黎，早前已被警方預約拘捕及拒保候查。楊師傅話，肥佬黎立秋後運勢弱，容易招惹官非，農曆九月最反覆，七、八月健康差，本來大運合流年吉昌，但六十歲至六十九歲期間大運與命格相沖，故羊年吉凶參半。不過，都係嗰句，八字命理嘅嘢，信不信由你。
至叻星：增公屋資格戶 須加建樓
房委會昨日建議調整公屋入息同資產限額，按住戶開支總額變動，分別平均加5.8%同7%，如獲採納，估計符合公屋申請資格嘅戶數會增加近十四萬戶，呢個建議可望令更多基層家庭合資格申請入住公營房屋，紓緩低收入人士無屋住同捱貴租嘅處境。不過，唔好忘記依家嘅公屋輪候冊已經有約二十七萬戶，換言之，呢個建議只會令等上樓條隊愈嚟愈長，兼令三年上樓嘅目標更難達到。身兼房委會主席嘅運房局局長張炳良須雙軌並行，唔好淨係識加人頭，仲要同時諗吓點樣增加房屋供應，否則盞畀市民「炳鑊甘」！
兜巴星：亂開位燒公帑 自肥瘦下
被嘲為「周一鑊」嘅周一嶽，喺掌管香港醫療衞生同食物安全政策時屢爆失誤，被政府「翻閹」做平等機會委員會主席後，亦醜聞同爭議不絕。最新被揭喺未經充分諮詢下，自行建議加設一個月薪逾十六萬嘅營運總裁職位，藉此提升多個現有高層職位薪級。但有熟悉平機會運作人士踢爆，依家月薪達二十三萬嘅周一鑊，本應兼顧該會嘅行政營運工作，佢唔減薪仲要加位卸走分內事務，擺明「自肥瘦下」，兼有為個別高層「度身訂造」升級加薪之嫌。呢隻廢鑊有正經嘢唔做，專諗埋呢啲益自己兼擴權嘅奸計，真係要快啲踢走佢！
第一手消息請下載on.cc東網
