文浩正（左起）、任建峰同梁允信等近五十人成立「法政匯思」組織。
舊年成功提出罷免律師會前會長林新強嘅律師Kevin任建峰，早前退出律師會憲制及人權事務委員會委員，決定「另起爐灶」，同打開人權官司嘅律師文浩正，以及商業訴訟嘅大律師梁允信等近五十人，尋日成立「法政匯思」組織，話要多啲落區向學生同市民講解司法獨立等精神喎。
其實Kevin住喺美孚，已成立咗「美孚家．政」，呢個時候再成立新組織，難免令人聯想同未來多個選舉有關。佢就預早斬釘截鐵，話唔會派人出選特首選舉委員會、區議會或立法會選舉，至於個別人士點諗就有佢哋自由。咁佢自己呢？佢重申「唔好搞我」，話要搵食兼要湊小朋友，加上鍾意喺「曠野外」發聲乜都鬧，為保言論自由，點都唔會加入建制。
不過，雖然佢話成立新組織唔係同兩個律師公會打對台，但就語帶雙關，一方面話律師會對人大八三一框架冇意見，「佢哋可以有自由繼續冇意見」，另一方面就話律師會連續兩屆立法會都有派人選法律界，又有用律師會牌頭選選委會，「唔會有人話律師會（咁樣做）唔得」。
第一手消息請下載on.cc東網
