劉文文（右）同弟弟劉文東都係樂善堂一分子。
個個都識得講吸煙危害健康，但早幾日有調查發現，每包香煙價格要加到過百港元先可以推動煙民決心戒煙。日前喺六大慈善機構同立法會嘅茶敍上，見到香港吸煙與健康委員會前主席兼樂善堂常務總理Lisa劉文文，當然問吓佢哋提倡加一倍煙稅後有冇乜嘢回響喇？佢就話暫時未見政府有表示，但就大讚現任委員會主席鄺祖盛開咗個加煙稅目標出來，就算最後加唔到咁多，清楚咗個大方向都係好事。
何榮添（前排左二）活動後與一班成員喺立法會餐廳再歎茶。
陳李妮喺立法會會議廳留影。
六間慈善機構包括東華三院、仁濟醫院、博愛醫院、保良局、仁愛堂同樂善堂前日喺立法會宴會廳舉行周年茶敍，順道參觀立法會大樓。雖然當中唔少人已經參觀過立法會，但仍準時到場輪流影大合照，就好似一個集合幾個慈善團體嘅定期聚會咁。已經出席過幾次聚會嘅Lisa話明白如果加煙稅一倍咁多，政府一定會畀煙民壓力，當然做到最理想，做唔到嘅話肯加少少都算係重要嘅一步。
何榮添等嫌做議員辛苦
到場嘅仲有東華三院主席施榮恆、博愛醫院主席何榮添、仁濟醫院主席蘇陳偉香、仁愛堂主席吳明珍同樂善堂主席羅永順等，雖然眾人參觀過立法會唔止一次，但就異口同聲話無興趣做議員，皆因淨係諗吓都知道好辛苦喎。
完咗大圍茶敍之後，何榮添仲帶埋一班董事局成員一齊落立法會餐廳歎下午茶傾偈，何榮添同博愛醫院副主席Lily陳李妮透露，做慈善團體幫得就盡量幫，幫唔到嘅未來可以再努力，壓力唔係太大，相對做議員無論做乜都總有人會不滿，加上不時「拉布」同飲食唔定時，對體力同耐性都係一種考驗。
第一手消息請下載on.cc東網
