競爭事務委員會同通訊事務管理局尋日發表咗《競爭條例》嘅六份指引擬稿，畀市民一個概括而全面嘅資訊，介紹競委會同通訊局會點樣執行同詮釋條例，作為由指引草擬至邁向全面實施條例嘅最關鍵一步。呢條例係要改善本港市場壟斷問題，以及打擊各行業損害競爭力嘅行為，競委會主席胡紅玉可謂交咗功課，但呢六份指引其實幾複雜，市民單靠睇諮詢文件唔容易了解，所以胡紅玉要行多幾步，面向公眾解釋多啲！咪匿埋，否則又會畀人鬧佢閉門造車。
