SUN奇古怪：Sun潮語：腳膠

本欄曾幾何時介紹過「真心膠」呢句潮語，當中亦有講過咩叫做「膠」。「膠」呢個潮語，喺呢一兩年開始非常普及。日常生活對話中，開始廣泛使用「膠」字，可能係因為香港好多事，真係變得愈嚟愈「膠」！例如一直係香港驕傲，甚至係全球華人引以自豪嘅廉政公署，最近都被傳媒揭發，前專員湯顯明其身不正，用上等茅台招呼北大人。其實宴請客人唔係問題，「膠」就膠在你忘記自己係咩身份，做廉政專員遇到呢啲強國飯局，係應該避得就避，但佢竟然連基本嘅政治智慧都冇，食完仲要諗計claim錢！呢啲咁「膠」嘅行為，我好有理由相信，同佢當時嘅老細貪曾有好直接嘅關係。由此可見，「膠」已經滲入香港每一階層，先唔好計女性胸部可以係「矽膠」，原來連腳都可以有「腳膠」！

好多女士都唔明，點解有啲男士咁迷戀女性嘅腳部。據非正式研究，成件事係男仔喺成長期，因身高問題，眼最先接觸成熟女性嘅身體部位應該係腳部，再加上高跟鞋呢類物體，更加突出腳部線條，唔敢抬起頭嘅怕醜麻甩仔淨係望到對腳，久而久之成為「腳膠」。日本AV甚至有「美腳」系列，針對「腳膠」市場。可想而知，「腳膠」真係全球化嘅問題。

「戀足癖」又好「腳膠」又好，其實都唔係問題，最重要都係對女性嘅尊重。就算喺港鐵遇到42吋長腿，再加四吋高跟鞋，仲要加條腳鏈，都要保持冷靜。畢竟腳係人哋嘅，架係自己丟嘅？！明未？