隧道塞車無窮盡 官腦便秘路不通

過海塞車長期困擾市民，政府早前提出「東隧減價紅隧加價」嘅分流方案，希望為問題尋找出路。但大家知啦，官老爺一向腦袋便秘，閉塞程度有時仲嚴重過繁忙時段嘅紅隧，方案係咪行得通好大疑問囉。

嗱，質疑方案嘅人真係唔少o架。喺立法會會議，有貨運業代表質疑，紅隧加價都係區區幾蚊之數，根本唔可能令搵食車浪費燃油同時間改道東隧，批評官老爺紙上談兵。

多名立法會議員仲索性向當局提反建議添，叫官老爺一係回購西隧減價分流，一係興建第四條過海隧道疏導車流，一勞永逸解決市民塞車之苦。嗱，都話東減紅加方案未必行得通o架啦，起碼喺立法會已經塞死晒先嘞，叮！

官老爺點回應呢？佢哋話喎，興建第四條海隧涉及填海，法例限制之下難以做到。至於回購西隧減價，鑑於附近連接路已經飽和，加上中環灣仔繞道又要一七年至落成，西隧減價只會令中環更擠塞喎。

唉，人哋話條條大路通羅馬，點解香港解決隧道擠塞就路路不通？究竟係海隧嘅擠塞問題無可救藥，定係高官嘅大腦閉塞病入膏肓呀？聽完官老爺解畫，市民就好似走咗入一條掘頭巷，前無出路，後有車龍，永無窮盡嘅塞車之苦到底仲要捱到何年何月呀？

撇開可行性唔講吖，就算東減紅加方案真係可以稍稍減少紅隧車流，亦唔代表市民以後穿山涉水暢通無阻o架。大家睇吓，三條海隧嘅車流設計上限係合共每日二十七萬六千架次，而現時每日實際車流量總和達到二十四萬七千架次，換言之，三隧已經瀕臨飽和。如果經濟持續向上，愈來愈多人買車，愈來愈多人坐的士，愈來愈多搵食車運貨，到時就算畀你三隧平均攤分車流，都一樣塞爆o架咋，而且仲唔係一條紅隧塞，而係三條海隧一齊塞，問你死未！

興建隧道不能一蹴而就，臨渴掘井就太遲嘞。更何況，如果興建第四條海隧係解決塞車嘅治本之道，點解唔趁諮詢一併研究呢？點解早早就打退堂鼓呢？正所謂路係人行出嚟，所謂法律問題，事在人為嘅啫，港府如果真係福為民開，快啲諗計幫市民過海暢通無阻！

講開又講，紅隧已經有四十年歷史，本報早前踢爆，呢條老爺隧道積勞成疾，又天花滲水，又鋼筋生銹，又石屎剝落，隨時死火咁款。各位交通官僚，無論東減紅加方案最後拍唔拍板都好，唔該都治理咗紅隧先，無人想香港步日本後塵，搞出隧道塌天花慘劇呀，叮！