加碼贈送現金券 《太陽》讀者笑呵呵

太陽底下多新事，時光倒流有可能。太一叮講緊乜？咪就係講《太陽報》物超所值囉，售價時光倒流，聰明嘅讀者又點會錯過吖。

大家可能會問，《太陽報》唔係啱啱調整售價賣七元一份咩，點解會時光倒流呢？嗱，條數好易計啫，等太一叮將其中奧妙話畀大家知喇。冇錯，因為紙價同其他成本近年持續上漲，《太陽報》不得不由四月七日起加價一元，今次係東方報業集團十二年幾以來首次調整售價，事非得已，讀者都表示理解，繼續不離不棄，鼎力支持，《太陽報》為咗答謝大家，連續贈送現金券，由三元至五元。即係話，讀者多付一元，就可以得到三元或五元現金券，《太陽報》實際上只係賣四元或兩元一份，咁係咪時光倒流吖？

講到呢度，讀者可能又會問，究竟點樣先至可以攞到現金券o架？辦法好簡單，本月二十一、二十三同二十五日，即係周日、周二同周四，《太陽報》隨報附送三元便利店現金券，周五加碼贈送百佳超市五元現金券，只要買份《太陽報》，就可以得到嘅喇，人人有份，永不落空。加碼贈送，加倍着數，話時光倒流幾十年，真係一啲都冇誇張o架。

當然，贈送現金券只係表示少少心意啫，對讀者最好嘅報答，就係內容精益求精，做到最好。相信各位睇過改版後嘅《太陽報》一定深有同感，新聞、財經、娛樂、馬經、副刊、體育等版面全面改革，全面強化，精彩紛呈，無論係題材選擇、文字工夫，或者係圖片漫畫、美術設計，統統畀人耳目一新嘅感覺。有人話，呢種感覺就係春天嘅色彩，真係好貼切o架。

太一叮唔係賣花讚花香，改版後嘅《太陽報》內容豐富，包羅萬有，而且焦點突出，拳拳到肉，深受讀者歡迎。就以最近市民最關心嘅內地禽流感疫情嚟講吖，《太陽報》唔只提供最新最全面嘅疫情訊息，呼籲市民加強戒備，仲將內地官僚刻意隱瞞、延誤通報、防疫混亂等惡行毫不留情暴露於陽光底下。無他o架，恨鐵不成鋼吖嘛，《太陽報》踢爆內地官僚懶散失職，揭露港產官僚防疫不力，無非都係想提醒當局吸取十年前沙士教訓，唔好再草菅人命啫。

細心讀者一定會發現，《太陽報》版面別具一格，零舍不同，最煞食就係為新聞人物度身訂造嘅漫畫，惟妙惟肖，抵死過癮。例如A疊港聞嘅「Sun搞作」，版面生動，圖文並茂，相片漫畫視覺效果一流；欄目多姿多彩，「Sun官場現形記」、「勁膠金曲」、「打橫嚟講」，謔而不虐，過目難忘；題材更加緊貼潮流，針砭時弊，切中要害。呢，好似日前諷刺貪曾「愛將」前廉政專員湯顯明大花筒嘅漫畫「嘥錢帝國」咁，將庸官劣吏嘅貪婪嘴臉描繪得入木三分，令人拍案叫絕。

一句講晒，加碼贈送現金券，《太陽》讀者笑呵呵。你哋嘅支持，就係我哋嘅動力，太一叮再次向大家衷心講一聲，多謝晒！