政壇：政商定格：蕭炎坤孻女出閣好溫馨

博愛醫院前主席蕭炎坤嘅孻女蕭文玲，早前下嫁喺金融機構工作嘅陳卓鋒。一對新人係基督徒，當日朝早先喺教堂行禮，然後移師尖沙咀酒店舉行西式婚宴，婚禮勝在簡單溫馨。新郎哥盛讚太太又靚又乖，亦好有愛心，事關太太係中學英文老師，對學生好好，咁好嘅老婆好難搵，所以拍拖兩年就決定拉埋天窗。

做過博愛總理嘅蕭家大仔Simon蕭文豪同太太Mary顏嘉、大女蕭文麗同老公都嚟幫手招呼親友，文麗嘅囝囝着到官仔骨骨做花仔，好得意。Simon同喺跨國金融機構工作嘅Mary已育有一子，Mary話囝囝依家一歲幾，半夜經常起身，照顧佢已經好辛苦，暫時未敢考慮追多個。