SUN微博：黐筋網相：不誠實，人生之不幸也！

細細個，學校就教我哋做人要誠實，唔誠實嘅人就好難喺社會上立足，可惜老師嘅教誨通常都畀人當做耳邊風。近日網上有網民上載一張麥記早餐嘅相，本來都無咩問題，但佢自爆自己畀咗＄29.5，但竟找番＄80.2畀佢，嗰位網友仲話將嗰份早餐，同找多嘅錢就咁拎走！

嗰位網友嘅行為自然為其他人不齒，對佢口誅筆伐。雖然只係80蚊，但嗰位網友又有冇諗過，可能有人因為犯錯而要被罰，自己嘅良心又過唔過意得去呢？

而最令小編覺得奇怪嘅係，明明做錯嘢，正常人都唔想畀人知，何解仲要自己話畀人知，公諸於世呢？最後嗰位網友仲留言話嗰日係「幸運嘅開始」喎，價值觀扭曲成咁，計小編話係人生嘅不幸就真！