重陽節墳場封路 運輸署失禮死人

生老病死係每個人必經之路，對香港人來講，拜山掃墓嗰段艱辛之路就真係無得揀嘞，年年攞命，年年要行，未到兩腳一伸，睇怕都要繼續捱落去。無計啦，鬼叫官老爺懶過鬼咩，永遠唔會行多一步，為孝子賢孫解決呢個拜山路難行嘅交通死結。

所以咯喎，聽日重陽節，太一叮提醒準備拜山嘅市民，如果閣下先人葬喺柴灣華人永遠墳場嘅話，以防萬一，除咗帶備三牲酒禮，最好帶埋跌打酒。點解？因為運輸署又搞封路囉，的士同小巴一律禁止上山，孝子賢孫閒閒地行成個鐘頭先至撐到上墳場，萬一對腳抽起筋上嚟，都可以捽番兩嘢吖嘛。

冇錯，墳場封路的確對市民造成不便，而且影響職業司機生計，所以運輸業尋日操上墳場抗議，直斥當局長期漠視問題，害到市民無車搭，業界無生意做。唉，運輸署都算失禮死人咯，叮！

柴灣華人永遠墳場已經係第二年封路o架嘞。墳場範圍本來有一條由天主教墳場管理嘅路，上年開始突然宣布唔開放畀公眾使用，當局唔知協調無方吖，定係闊佬懶理，總之一句封路就關人個關。立法會議員王國興踢爆，運輸署今年六月曾經承諾會開放路段o架，點知至今無晒下文，質疑有關方面拖延投訴。其實王議員，運輸署呢種唔嗲唔吊嘅態度，已經答咗你啦，即係呢個問題等出年拜山至講囉！

叮佢個鎯鎯，港產官僚懶散成咁，係咪見鬼吖？一條將軍澳華人永遠墳場嘅上山長命斜，已經令到拜山人士聞風喪膽o架啦，家陣又炮製多一條拜山苦路出嚟，死得佢吖！

對中國人來講，慎終追遠係一條漫長之路，年年要千辛萬苦先至能夠克盡孝道，好無陰功o架。唔該官老爺急市民所急，快快諗計取消呢項霸道措施啦，一來畀條生路運輸業行，二來唔使市民行到死死吓吖嘛。你知啦，好多公公婆婆都係高齡廿四孝，容乜易撐到先人墳前已經氣若游絲o架，唔通以後要帶定急救箱拜山咩？

咁講啦，慎終追遠係中國人嘅傳統美德，市民固然重視，官老爺更加唔可以輕視。事關搞到條條拜山之路艱辛難行，等於逼市民做不孝子孫，唔好話孝子賢孫同運輸業界唔妥你哋啦，萬一搞到下面嘅先人都要向你哋報夢投訴，咁就真係撞鬼咯，叮！