SUN微博：打橫嚟講：點止保育咁簡單

呢件貪曾，所做埋啲衰嘢，真係多到令人咋舌，即使佢拍吓個籮柚走咗，但賴低啲蘇州屎，既臭且掃之不盡，遺禍香江。

擠滿罕見瀕危物種，非常有生態價值嘅大埔龍尾泥灘，政府居然執意喺下個月動工，堆啲沙填平佢，偽造個「人工泳灘」，唉！真跳海矣！

堆沙改造泳灘，唔係話將一大堆沙鋪蓋着那處的爛泥石地，改裝成一個擺滿粗沙的海灣，就對市民福利好。全港係人都知，那處海灣水質公認差劣，不適宜游水的，何解政府會「落實」喺嗰度填沙害人o架呢？

啊！又係那個契弟貪曾之所為，原來，此乃○七年煲呔成功連任後，為「答謝」當地支持佢的「回饋」，是政府廿五項優先開展設施之一喎！查實，就係表面想藉泳灘效應，製造旅遊熱點，暗地實情係做旺當地樓價，刺激嗰度村屋買賣。

嗱！呢啲衰嘢，唔好話有人用陰謀論去測量中間有無人做手腳「落格」，今屆政府也應好好去追查真相，如實話番畀大眾知，拆彈之餘，也凸顯局長英明，一改世人背後暗笑佢無能之誤。

據知，政府內部話大埔有好多個泥灘，可以將「罕見瀕危物種」大遷徙到其他泥灘喎！唉！究竟佢哋有無常識o架？怪不得啲保育團體及生物學者，日日都氣得一頭煙啦！

唔係啦！唔該逗緊香港納稅人銀両嘅陸恭蕙副局長，快啲出手，救救地球、救救弱勢上司！阿們！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：狗噏罵港人

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot