政壇：搞搞政：阿Ann發炮變放笑彈

建仔今屆推咗幾個新丁入立法會，新丁埋位兩個禮拜即見真章。講到冒起得最快嘅新丁，莫過於「機器大王」蔣震二女蔣麗芸（Ann）。咪睇阿Ann平時高貴大方笑容甜美，但原來佢鬧起人上嚟絕對係表情氣勢樣樣有，上禮拜五財委會上，佢就施展「教仔功」，逐一點名指罵泛民議員唔夠謙厚、講英文兼離位周圍走，聽到佢班黨友目瞪口呆，只好頭耷耷「繼續謙厚」，班泛民議員就掩嘴忍笑。其實阿Ann作為「炮手」，炮彈冇乜殺傷力，又不時為議會製造歡笑，都抵頒個議會和平獎畀佢吖，不過有網民直言蔣震有此另類淑女實叫人大跌眼鏡。其實又關佢爸爸乜事啫？

另一新丁EQ葛珮帆上禮拜五開完會後，急不及待喺facebook暢談佢嘅「議會生涯」，一邊大呻連續三日開會，一邊埋怨泛民議員太多嘢講搞到佢「坐到頭痛，更為香港心痛」。但呢段「勇敢的表白」就引嚟網民圍插，有網民估計佢因為坐住自己個頭，搞到齋坐都會頭痛，有網民則為立會有EQ感到心痛，亦有網民好「同情」佢，勸佢見辛苦就唔好做議員喇。不過EQ就好似唔多領情，尋日仲自行了結「議會生涯」，使出刪貼絕招。EQ就解釋話，因為有網民留言有粗口，引起家長投訴。