政壇：搞搞政：高達落選留低蘇州屎
長者生活津貼計劃成為泛民同政府較勁嘅新戰場，泛民主派議員為求迫使政府跪低，日前聯署要求押後表決，勞工及福利局局長張建宗尋日出席個活動時，就踢爆有上屆議員早喺今年七月，已經提出召開特別財務委員會通過撥款落實呢個計劃，暗示家吓有政黨又轉軚，翻查紀錄，原來佢講嘅係白鴿黨落咗選嘅李永達，今次高達真係留低蘇州屎囉！
白鴿黨喺議會嘅立場，同高達當日嘅倡議完全兩回事，到底係白鴿打倒高達？定係白鴿齊齊「打倒昨日的我」呢？張建宗嘅爆料同政務司司長林鄭月娥踢爆公文袋一樣，都係不忿佢哋轉軚當食生菜。依家四十萬合資格長者渴望早攞津貼，泛民議員就掛住政治拗手瓜，難怪香港社會服務聯會行政總裁方敏生都睇唔過眼，尋日講明唔贊成立法會押後表決計劃。
設計圖片及對白