政壇：阿基遊墾丁叉電獨樂
立法會啱啱開鑼，民協馮檢基反而放假抖幾日，趁臨近重陽節假期，尋日一個人去台灣墾丁風景區休息番幾日，順便去埋高雄玩。阿基話，短短兩年內經歷區議會同立法會兩次大選舉，選舉後呢頭恢復過嚟，嗰頭就要面對排山倒海嘅立法會會議，都咪話唔辛苦。
阿基太太喺理工大學負責行政管理工作，依家忙緊處理新課程同學生住宿等棘手議題行唔開，佢惟有獨自去偷歡，而呢次重陽節假期得四日，去唔到太遠嘅地方，阿基又一直想去墾丁玩，所以前幾日就拿拿臨去買機票同訂酒店。佢話讀大學時試過一個人去尼泊爾流浪一個月，當時成個月都講咗唔夠二十句說話，所以相信今次墾丁之行唔會覺得孤獨喎。
